2023 иестэ важодемань невтевкстнэде ды 2024 иентень прявт тевтнеде пачтямонть марто пшкадсь райононь прявтось Светлана Герасимова.
2023 иесь кандсь райононть туртов цетавкст, ламо теезь. Аграрийтне пурнасть рекордонь норов. Кассь сывелень ды ловсонь производствась, ламолгавтовсь прявт капиталс инвестициятнень покшолмась. Вейке эрицянть лангс эрямо таркатнень максоманть коряс районось саи васенце тарка. Ламолгадыть вишка ды средней бизнесэнь субъекттнэ – мелят сыненст явозь 149 млн целковойтнень покшолмасо государствань лезкс, кавто проекттнэ кармасть туризмань коряс гранттнэнь пелькстамонь изницякс – те Карнай эрькень чиресэ пляжонь теемась ды Сура леенть лангсо пляжонь вадрялгавтомась.
Эрязасто виевгавтови эрьва кодамо енксонь туристической бизнесэсь. Улить оймсемань таркат, конатне пек вечкевить: «Кречет» сафари-паркось, «Песчаный берег», «Мураньские зори».
Пек лездыть нацпроекттнэ: «Жилье» региононь проектэнть лувсо строязь автомобилень ниле кить Булгакова велесэ, «Содействие» федеральной программанть коряс витнезь кото кить Семилей, Кочкурова, Кацелай велетнесэ, витнезь кудотнень перька таркась Булгакова велесэ. Витнезь китнень 13 вайгельбеть.
«Культура» нацпроектэнть лувсо педе-пев витнезь Кочкуровань искусствань школась ды Вирь ало Тавласо культурань кудось. Витнезь Владимир Ромашкинэнь лемсэ музеесь.
Ташто кудосто одс эрицятнень ютавтомань программанть коряс строязь 12 квартирань кудо.
Велетнень вадрялгавтомань-мазылгавтомань программанть коряс эйкакшонь площадкат теезь Кочкурова велесэ ды Воеводское станциясонть, мини-футболонь площадка Сурвелесэ, эрямонь таркат.
Покш арсемат 2024 иенть коряс. Истя жо 509 млн целковойть явовить китнень нацпроектэнть лувсо Саранск - Кочкурова - Сурвеле, Саранск – Булгакова – Внуковка китнень витнемс, вейсэнь кувалмсо 16 вайгельбеть.
Сессиясонть истя жо кортась «Норов» компаниятнень группань председателесь Александр Поздняков – сон кортась холдингень арсематнеде, кепедизе велень хозяйствань предприятиятнень туртов кадратнень анокстамонь кевкстеманть, евтась сюкпря земляктненень важодеманть кисэ, арсесь вейсэндявома весе тевтнесэ. «Эряви лездамс вейке вейкенень, кенярдовтомс вейке вейкень, вешнемс ломантнесэ вадрянть, а явомс мель асатыкстнэнь лангс. Тенесэ минек виесь!» – тешкстызе сон.
СВО-нь участниктненень лездыцятнень вийдест ды ушодкстост евтнесь волонтерось Елена Лезина. Сон кармавтсь райононь эрицятненень седе эрязасто вейсэндявомс те важодемантень. Минек боецтнэнень эряви марямс земляктнень кирдемаст!
Районсонть туризманть виевгавтомадонзо евтнесь «Кречет» сафари-парконь руководителесь Светлана Каткова. Мелят парконтень сакшность 13 тежат туристт, натой омбо мастортнэстэяк. Проектэнть – покш арсеманзо сы шкантень.
Мордовиянь Прявтось, сессиясонть кортамсто, евтась сюкпря те енксонь эрицятненень важодеманть кисэ, тешкстызе эсь доходтнэнь кастоманть ды финансонь дисциплинанть ладямонть коряс динамиканть. Районось саи республикасонть васенце тарка аволь налогонь доходтнэнь касомань темпанть коряс.
Кевкстематнеде, конатнень эряви витемс, эште ламо. Эряви одкстомтомс жилищно-коммунальной инфраструктуранть. Эряви ванськавтомс ТБО-нь аволь санкционированной шукшпрянть (покшолмазо – 6 гектартнэде седе ламо, эрявить 300 млн целковойть).
Поладови важодемась каладозь эрямонь кудотнестэ одс эрицятнень ютавтомань, догазификациянь, китнень витнемань коряс важодемась.
Социальной инфраструктурась – истя жо башка ванновт ало, васняяк кортамось моли эрицятнень пшкадемадост. 2026 иестэнть арсеви педе-пев витнемс Сурвелень средней школанть. Педе-пев истя жо эрявить витнемс эште колмо эйдень кужотнень ды колмо школатнень. «Карматано анокстамо яволявтомат башка пелькстамонтень», – мерсь Артём Здунов.
Шумбрачинь ванстомань первичной звенанть одкстомтомань программанть лувсо эряви витнемс кавто ФАПтнень.
Ванновт ало – Булгакова велесэ ДК-нь строямонь кевкстемась. Мордовиянь Прявтось алтась райононтень лездамс коммунальной техникань рамамосо.
Мордовия Республикань Прявтонь пресс-службась