Эсь прявт тевекс Путин евтызе Россиянь суверенитетэнь кемекстамонть, эрицятнень праваст ды олячист ванстоманть:
«Мон кортынь теде уш ламоксть, аволь пежетькс евтамс эште весть. Истямо масторонть туртов, кода Россиясь, суверенитеттэме улемась а лиси, сон а ули. Секскак прявтось – суверенитетэнь кемекстамось».
Виде линиянть шкасто Владимир Путиннэнь пшкадсь «Мордовия» ГТРК-нь корреспондентэсь Анастасия Видяева. Журналистэсь тердизе Президентэнть ВДНХ-со республикань экспозициянтень ды тешкстызе, 97% эрицятне кирдить каштанчи «Россия» выставканть-форумонть ваномадонзо мейле.
Владимир Путин кирдизе меленть: выставкась лиссь вадря, региононь экспозициятне – сехте редявикстнэстэ вейкетне, ВДНХ-со ваныцятнень туртов сехте мельстуицят.
«Мордовиясь алкукс пек мазый республика. Монень пек мельстукшны, кодамо мель ломантне явить эсь койтненень-кирдатненень, эсь культурантень, оршамопельтненень», – тешкстызе государствань прявтось.
Раськеютконь ды экономикань кевкстематнеде башка, Президентэсь кортась социальной тематнеде, конат токшить ЖКХ-нть, межконфессиональной отношениятнень, аборттнэнь. Президентэнть валонзо коряс, демографиянь стакачинть мереви витемс свалшкань питнейчитненень пшкадеманть вельде, сынст ютксто вейкесь – покш семиясь; эрямонь вадрялгавтоманть, чачтомань кудотнень одкстомтоманть ды семиятненень лездамонть коряс седе тов важодеманть вельде.
«Государстванть ули мелезэ витемс демографиянь стакачинть. Те чарькодевиця тев. Ансяк, одс евтаса – аванть праванзо ды олячинзэ истя жо улест ванстозь», -тешкстызе Владимир Путин.
Виде линиянть шкасто Президентэсь евтась сюкпря Россиянь эрицятненень: сынь истямо мель явить фронтонь вешематненень. Масторонь эрицятне явсть 10 миллиардто седе ламо целковойть, малав 3 миллионт лембе сермат кучсть передовоев эйкакштне.
«Нама, государствась цидярды те лезкстэменть, ансяк лоткавтомс а лиси. Минь весемеендо карматано тень кирдеме. Евтан сюкпрянь валт весе доброволецтнэнень, весе волонтертнэнень», – мерсь Владимир Путин.
Владимир Путин евтась мель Россиянь эрицятненень ютавтомс од иень кенярксчитнень семияст марто: «Од иестэнть эряви покш мель явомс малавикстнэнень, семиянтень, муемс вейсэнь тев – выставкат, театрат, спорт».
Россиянь лидерэнь пресс-секретаресь Дмитрий Песков пачтясь, Общероссийской народной фронтонь (ОНФ-нь) представительтне ванносызь весе пшкадематнень, конат састь РФ-нь эрицятнень пельде Владимир Путин марто виде линиянтень.
Фотось: http://www.kremlin.ru