Владимир Сушков важодемань содавтома марто ульнесь Мордовиянь Краснослободской ды Ташто Шайговань ёнкстнэсэ

Владимир Сушков важодемань содавтома марто ульнесь Мордовиянь Краснослободской ды Ташто Шайговань ёнкстнэсэ

Региононь Правительствань председателесь Владимир Сушков макссь питне Краснослободской ды Ташто Шайговань ёнкстнэсэ социальной инфраструктурань объекттнэнь теемантень.

Краснослободской ёнксонь Якстере Подгора велесэнть строяви спортонь площадка. Тесэ карми оскасо налксема пакся, баскетболонь-волейболонь площадка, чийнемань туртов яннэть. Объектэнть питнезэ – 16,9 млн целковойть. Зярдо проектэсь топавтови, тесэ кармить ветявомо физкультурань уроктне, велень эрицятненень истя жо мереви якамс тей.

Владимир Сушков кармавтсь райононь администрациянтень региононь спортонь министерстванть марто вейсэ муемс вадря тренерт Якстере Подгора велень поселениясонть спортонь занятиятнень ютавтомаст туртов.

Седе тов Правительствань Председателесь ваннызе Ташто Шайгова велень культурань кудонть, конась стявтови «Комплексное развитие сельских территорий» государственной программанть лувсо. Тесэ карми 46 таркас кинозал, ловномань нупаль марто библиотека, хореографиянь класс, 300 таркас концертэнь зал, костюмерной ды гримерной нупальть, звукозаписень студия, ремеслань студия, эйкакшонь налксемань нупаль. Объектэнть вейсэнь питнезэ 146,8 млн целковойть (117,3 млн целковойть пачтязь федеральной бюджетстэ). Неень шкане подрядчикесь - «Ремстрой» ПАО ООО – прядызе стенатнень вачкамонть. Ветявить важодемат латонть вельтямга, маласо тарканть вадрялгавтомга, ушонь стенатнень лембелгавтомга ды потмонь отделканть теемга. Владимир Сушков кармавтсь топавтомс объектэнь максомань шканть – 2020 иень ацамковонь 25-це чинтень.

Меельцекс Од Акшино велесэнть ваннызе «Октябрьская» Агрофирма АО-нь сюронь пивсэманть. Течинь чинтень пурназь сюронь 57%, саезь 3385 тоннат, эрьва гектарстонть – 31,6 центнерт.