Июнень 27-це чистэ Мордовиянь Прявтонь тевтнень нурька шкас топавтыцясь Владимир Волков вастовкшнось Мордовиянть пельде Госдумань депутатонть, безопасностень ды коррупциянь а нолдамонь коряс комитетэнь председателенть Василий Пискарев марто.
Кортавсть 2018 иестэ Футболонь коряс масторлангонь чемпионатонть шкасто Саранскоень эрицятнень ды инжетнень сэтьмечист ванстомань кевкстематне. Владимир Волков тешкстызе, республикасонть кемекставить эрявикс весе тевтне, эрьва ломанесь марязо прянзо сэтьмечисэ. Тень туртов эряви ванномс раськеютконь покш пелькстамотнень ютавтомань шкасто мирэнь ды Россиянь опытэнть.
«Футболонь коряс масторлангонь чемпионатонть вадрясто ютавтомась ламосо ашти сень эйстэ, кода сэтьместэ кармить марямо пряст сонзэ участниктне ды ваныцятне. Секскак сэтьмечинь кевкстематнень карматано кирдеме башка ванновт ало», – тешкстызе Владимир Волков.
Республикань лидерэсь ды Государственной Думань депутатось кортызь зярыя кевкстематнень, конат токшить образованиянь ды здравоохранениянь виевгавтоманть. Тешкстазель, неть сфератнень материально-технической базанть кемекстамонь коряс важодемась ули поладозь.