Пецясто, ноябрянь 24-це чистэ, Мордовия Прявтось, «Единая Россия» партиянь Высшей советэнь членэсь Владимир Волков ульнесь «Единая Россия» партиянь Мордовиянь региононь отделениянь XXV-це конференциянь важодемасонть. Чинь повесткань прявт кевкстематне – 2017 иень перть важодемань итогтне, региононь отделениянть важодемань прявт тевтне ды «Единой Россиянь» XVII-це Съездс делегаттнэнь кочкамось.
Конференциянь важодемасонть истя жо ульнесь «Единой Россиянь» региональной отделениянь секретаресь, партиянь Генеральной советэнь членэсь, республикань Государственной Собраниянь Председателесь Владимир Чибиркин, правительствань, ошонь администрациянь, муниципальной образованиятнень, «Единой Россиянь» Центральной исполнительной комитетэнь важодицятне, депутатонь корпусось, промышленной предприятиятнень, общественной организациятнень, од ломанень вейсэндявкстнэнь прявттнэ. Весемезэ тешкставсть форумонь 222 делегатт.
Течинь чине республикасонть эрямос совавтовить партиянь 19 проектт, конат седе пек сюлмавозь социальной енксонть марто. Весе сынь анокставсть кочкицятнень кармавтомась мельс саезь, ванновсть кода эйкакштнень ды од ломантнень, истя сыретнень мелесткак. Вете проекттнэнень явовить ярмакт федеральной куншкакуросто – неть «Городская среда», «Парки малых городов», «Детский спорт», «Местный дом культуры», «Театры – детям».
Мордовиянь Прявтось, «Единая Россия» партиянь Высшей советэнь членэсь Владимир Волков евтась покш сюкпря партиянь члентнэнень Мордовиянь Прявтонь кочкамотнесэ кемеманть ды кирдеманть кисэ.
«Минь ютынек те кампаниянть вейсэ, весе этаптнесэ мон маринь партиянь члентнэнь, минек активисттнэнь ды минек ёно аштицятнень алкукоснь кирдемаст.
Тынь содатадо, Россиянь Президентэсь Владимир Путин максь мель тень ютамс кочкамотнес ды кемекстамс сеть результаттнэнь, конатнень минь тынк марто вейсэ теинек меельце иетнень перть. Штобу минь вейсэ поладовлинек икелев молеманть. Монень, кода Мордовиянь руководителенть ды эрицянть туртов, Президентэнть истямо кемемась аонкставикс. Теке марто, монь седе тов важодеманть, минек вейсэнь аравтлувонь топавтоманть туртов пек эрявикс весе эрицятнень, «Единая Россия» партиянть ды весень тынк кемеманк ды лезксэнк. Течи ёвтан сюкпря кочкамонь кампаниянь весе участниктненень мельтнень-арсематнень, кочкамотнесэ ёроков участиянть кисэ!» – мерсь республикань лидерэсь.
Владимир Волков мерсь, изнямс кочкамотнесэ – те аволь кочкамс покш процентт, кадомс удалов политической оппонентнэнь. Изнямс – те кемевтемс ломаненть, минек улить виенек лездамс тензэ, карматано пштистэ ванстомо сонзэ праванзо, тееме весементь эрямонть вадрялгавтомга.
Республикань седе тов виевгавтомань прявт принципесь – «Экономикась ломаненть туртов». Прявт таркас путозь социальной тевтне. Республикань изнявкстнэ онкставить ломанень потенциалонь касомасонть, аволь ансяк экономикань невтевкстнэсэ. Мордовиянть вадря эрямозо – те башка саезь эрьва семиянть, эрьва ломаненть парсте эрямось.
Ламот предприятиятне ладизь эсь роботаст течинь вешематнень ды условиятнень коряс. Республикань промышленностесь касы. Ломантне кемить вандынь вадря чинтень.
Промышленной производствань индексэсь тедедень 10 ковтнень перть невти 111,2 %. Отгрузкань покшолматне касыть 10%. Малав 6% касома невти строямонь сферась, 4 % – агропромышленной комплексэсь.
Стакачитнень лангс апак вано, ютазь иестэнть панжозь 12 од производстват. Тедеде ушодозь эште кото заводтнэнь строямось. Теде башка, тедедень колмоце кварталстонть нолдавсть колмо покш производстват.
Кортамось моли силовой кабельтнень высокотехнологичной производствадонть, световой приборонь Саранскоень заводтонть ды «Эпромет» компаниянть металлургической производствадонть. Неть заводтнэнь эйстэ эрьвась иезэнзэ карми нолдамо продукция 3 млрд. целковоень питнесэ.
Теке марто кевкстематнеде ды мелявкстнэде эште ламо. Неень шкане икелев ливтеви конкурировиця производстванть теемань кевкстематне. Маласо иетнестэ покш эскелькс теема цифровой экономиканть, наукоемкой промышленностенть нолдамосо.
Владимир Волков башка тешкстынзе аграрийтнень саевксэст. Велень важодицятне пурнасть 1 миллион 450 тыщат тоннат сюро. Те сехте вадря невтевкс республиканть весе историянть перть.
Неть невтевкстнэнь саемс удалась аволь вадря пертьпельксэнть шкасто. Сюронь урожайностесь кармась 34,4 центнерт гектарсто. Истямо урожайность республикась сайсь васенцеде, икельдизе эсензэ 2009 иень рекордонть.
Иенть перть хозяйстватнесэ ракшань ды нармунень сывеленть арсеви нолдамс 300 тыщат тоннат. Те редявикс тешкс. «Ёвтаса, 2012 иестэнть нолдазь 145 тёжат тоннат сывель, тень вельде саезь 1990 иень результатось – советской шкань сехте покш невтевксэсь. Меельце вете иетнестэ топавтозь седеяк ламо – те невтевксэсь ламолгавтовсь кавксть», – тешкстызе республикань Прявтось.
«Ней минь путтано од аравтлув – маласо вете иетнень перть сывелень анокстамонть пачтяма 400 тыщат тоннас. Кемекстаса, ракшатнень трямонь-кастомань комплекстнэ, конатнень строямось ветяви республикасонть, лезды тень теемс», – тешкстызе Владимир Волков.
Покш важодема ветяви 2018 иень Футболонь коряс масторлангонь чемпионатонтень анокстамонть коряс. Тедеде уш арсевить прядомс малав весе объекттнэнь. Теде башка, ветяви покш важодема Саранскоенть, Рузаевканть, минек райцентратнень ды велетнень вадрялгавтомань-мазылгавтомань коряс.
Чемпионатонь вадрясто ютавтомась кемекстасы Мордовиянь имидженть, кода масторонь икеле молиця регионтнэстэ вейкенть.
Чемпионатонь наследиясь жо — од киланготне ды гостиницатне, эрямо кудотне ды студенттнэнь туртов общежитиятне, од сквертнэ ды мазый таркатне свалшкас лиядыть республикань эрицятненень.
«Единая Россия» – те народонь партия, конанть кирдить масторонь ды республикань ламот эрицятне. Ды минек марто тынк лангсо ашти покш кемема весе сеть тевтнень ды проекттнэнь коряс, конат тевс нолдавить масторсонть ды регионсонть. Эрицятне – минек кочкицятне – учить минек пельде тевть, талновтыця кевкстематнень решамонть», – кемекстызе республикань лидерэсь.
Конференциясонть кортамсто, партиянь региононь отделениянь секретаресь, МР-нь Госсобраниянь Председателесь Владимир Чибиркин евтнесь иень политической прявт тевтнеде, конань невтевкстнэ кармасть сехте вадрят Россиянть келес.
«2017 иень сёксь» кочкамонь кампаниясь ютавтовсь пек вадрясто, кочкамотне ёвтазь видекс ды легитимноекс. Мордовиясо ютавтовсть Республикань Прявтонь кочкамот ды эште ютавтовсть кочкамот муниципальной районтнэнь, ошонь ды велень поселениятнень депутатонь Советтнэс. Единоросстнэ лиссть изницякс. Покш сюкпря весенень, кие роботась те кампаниянть ютавтомга, весенень, кить важодсть республиканть ды сонзэ эрицятнень лезэс», – мерсь региононь отделениянь секретаресь.
Россиянь Федерациянь 16 субъекттнэнь ютксо Мордовиясь невтсь кочкицятнень самонь сехте покш процентт. Кочкамонь участкатнес сакшность малав 82 процентт весе кочкицятнень эйстэ. Владимир Волковонь кисэ эсь вайгелест максызь 89,19 процентт.
Республикнаь общественной ды политической эрямосонть ёроков участиянть ды региононь политической стабильностень топавтомасо покш путовксонть кисэ партиянь региононь отделениянь активисттнэ казезь Мордовия Республикань Государственной Собраниянь Грамотасо ды партиянь Мордовиянь региононь отделениянь Благодарственной грамотасо.
Конференциянть лувсо кочкавсть «Единой Россиянь» XVII-це Съездс делегатт, конась ютавтови декабрянь 22-23 читнестэ Московсо.