Февралень 8-це чистэ Мордовиянь Прявтось Владимир Волков примась участия торжественной промкссонть, конась алатезель Россиянь наукань чинтень ды Рузонь технической обществанть 150 иетнень тешкстамонтень.
«Мордовиясо эрязасто виевгады инновациясь. Республикасонть прядомова лангсо инновациянь инфраструктурань теемась. Течи минь панжинек Эйкакшонь технопарк ды «Молодежный» бизнес-инкубатор. Те региононь инновациянь енкссонь кавто покш объектт, конат кармить наукань ды бизнесэнь тердемань од таркакс», - мерсь Владимир Волков.
Мордовиянь Прявтонть валонзо коряс, од объекттнэ кармить наукань мелень алкуксонь топавтомакс. Од ломантне, школань парта экшстэ саезь, кармить топавтомо эрямос инновациянь теевкстнэнь. Самай тесэ важодема таркань максыцятне кочкить эстест сотрудникть, вузтнэ - сы шкань студентт.
«Эйкакшонь Технопарконтень путозь оборудованиясь мейсэяк а явови Н.П.Огарев лемсэ МГУ-нь, заводтнэнь, предприятиятнень научно-исследовательской лабораториятнень эйстэ. Миненек эряви теемс весементь, ёроков од ломантне кармаст васенцекс аволь ансяк республикасонть, истя жо Россиясонть», - тешкстызе В.Д.Волков.
Мордовиясь масторонь келес васенце инновациянь продукциянть нолдамонть коярс. Промышленной весе продукциянть эйстэ те 28%. Республикась саи васенце таркат. Экономикань высшей школань инновациянь виевгавтомань рейтингсэнть. Иень перть минек регионось 18 таркасто кепедевсь нилецес, Россиянь келес кармась васенцекс инновациянь активностень индексэнть коряс.
Республикань инновациянь виевгавтомасонть башка мель явови Мордовиянь Технопарконтень, конась ютазь иень невтевкстнэнь коряс кармась 7-кс масторонь 100 сехте вадря технопарктнэнь юткссо. Течинь чинтень учреждениясонть 92 компаният-резидент, косо важодить малав 2000 ломанть. Технопарконь продукциянь ды услугань покшолмась кармась 6 млрд целковойть.
МР-нь Прявтось евтынзе региононь ды Технопарконь прявтнэнь икеле аштиця прявт тевтнень.
«Эряви прядомс сонзэ юрсо Инновациянь проектированиянь ды Волоконной оптикань Инжинирингень Центранть тееманть. Тешкстаса, миненек удалась вейсэндямс научной весе школатнень, конат важодить спецволокнанть марто, истя жо лезкс тенек явсть мирэнь келес содавикс ученойтне ды омбо масторонь партнертнэ. Неть проектнэнь топавтомась лезды кемекстамс весе республикань конкурентноспособностенть», - мерсь Владимир Волков.
Науканть виевгавтомантень лезды научно-производственной кластертнэнь теемась. Ютазь иестэ «Волоконная оптика и оптоэлектроника» кластерэсь лиссь изницякс весероссиянь пелькстамосонть. Мордовиясь кармась «Развитие инновационных кластеров - лидеров инвестиционной привлекательности мирового уровня» проектэнь участникекс.
Весе те кемексты Мордовиянь имидженэнть. Республикань Правительствась яви весемеёндонь лезкс лекарствань од видэнь аноксамонь коряс научно-производственной куншкакуронть коряс Н.П.Огарев лемсэ МГУ-нь ды «Биоимик» заводонь вейсэнь проектэнтень.
Республиканть лезксэнзэ вельде вузсонть топавтови Россиянть келес лия енов а молиця проект кремниень карбидэнь монокристаллтнэнь кастомаст коряс. Те лезды теемс Мордовиясо инновациянь полупроводникень прибортнэнь производствань масторонь келес сехте покш комплекс. Теде башка, университетсэнть ветявить ванкшномат-тонавтнемат материаловедениянь, биотехнологиянь, агроинженериянь ды энергосбережениянь коряс.
Мордовиясо башка мель явови од ломанень науканть виевгавтомантень, технологической бизнесэнтень од ломантнень тердемантень.
Республикасонть парсте важоди Ёроков эйкакштнень туртов лицеесь, конась омбоце ие саи омбоце тарка Россиянь 500 сехте вадря школатнень юткссо. 6 иетнень перть лицеень тонавтницятне сайсть 133 медальть Раськеютконь предметэнь олимпиадатнесэ. Сынст эйстэ 45 - сырнень. Изнявкстнэ саезь математикань, физикань, химиянь, астрономиянь, биологиянь коряс.
«Минь бажатано тердемс од ломантнень инновациянь проектнэс, конат топавтовить республикасонть. Студенттнэ ёроковсто тердевить вузтнэнь пингстэ инновациянь вишка предприятиятнень важодемантень. Ламолгадыть патентнэ, конатнэсэ примить участия студентнэ, - мерсь МР-нь Прявтось. - Улить вадря невтевкст од ломантнень арсевксэст-теевксэст производствас нолдамга. Истя, «Инжиниринговый центр энергосберегающей светотехники» организациянть кармавтоманзо вельде ютазь иестэ теезь «АДИП-СВЕТ» аппаратонь-программань комплексэсь. Од ученойтнень эште вейке теевксэст - кремниень карбидэнть юрсо энергиянь преобразованиянть туртов инвертортнэ. Сынст производстваст туртов теезь технологиянь башка компания».
Университетсэнть тевс нолдазь Россиянь наукань фондонть грантось, конанть юрсо исследовательтне важодить Испаниясто Фернандо Бриз профессоронть прявтсо. Те проектэнть топавтыть 10 ломанть, 7 эйстэст од ученойть.
«Минь седе товгак карматано тееме весементь ёроков од ломантненень лездамга, наукань вадря мельтнень-арсематнень топавтомга, исследованиятнень ды опытэнь-констурктортнэнь важодемаст ютавтомга, - мерсь В.Д.Волков. - Неть плантнэнь вадрясто топавтомга минек ули прявтось - маштомачитне, лезэв мельтне-арсематне ды эсь тевенть вечкемась. Самай неть енксстнэ лездыть топавтомс Мордовиянь научно-технической прогрессэнть, лездыть эскелемс икелев».
Мероприятиянть лувсо евтазь «Инженер года Республики Мордовия - 2016» Республикань XII пелькстамонь итогтне, сонзэ ютавтызе Рузонь технической обществась. Мордовиясо сонзэ отделениясь важоди Саранскоень наукань ды техникань кудонть юрсо.
Пелькстамонь участниктнень важодевксэст совавтовить производствас, лездыть отказамс импортонь оборудованиянть ды комплектующейтнень эйстэ, кандыть экономикань эффект.
Кенярксчинть кувалма поздоровт истя жо евтасть МР-нь Госсобраниянь Председателесь Владимир Чибиркин, Правительствань Председателенть полавтыцясь - МР-нь Промышленностень, наукань ды од технологиятнень министрась Александр Седов.