Мордовия Республикань Прявтонь тевтнень нурька шкас топавтыцясь Владимир Волков июнень 30-це чистэ ульнесь Россиянь ды Белоруссиянь регионтнэнь IV форумсонть.
Форумонь важодеманть лувсо ютавтовсь Россиянь ды Белоруссиянь парламентнэнь верце палататнень прявттнэнь Валентина Матвиенконь ды Михаил Мясниковичень кавто масторонь субъекттнэнь прявттнэнь марто вастовомась. Тешкстазель, течи прявтокс ашти мастортнэнь ютксо важодемань кавтоёнксонь сюлмотнень виевгавтомась.
Форумонь пленарной промкссонть, конась алтазель покш технологиятнень, инновациятнень ды информациянь обществанть интеграциянтень, ульнесть Россиянь ды Белоруссиянь президенттнэ Владимир Путин ды Александр Лукашенко. Россиянь Федерациянь лидерэсь тешкстызе, минек масторось учи Белоруссиянь ёнксонть марто вейсэнь лезэнь кандыця проекттнэнь ламолгавтоманть.
Истя жо Форумонть лувсо тешкстазель Мордовия Республикань Правительстванть ды Беларусь Республикань Правительстванть ютксо вейсэнь важодемадо соглашения. Сонзэ коряс арсеви виевгавтомс микшнемань-экономикань, научно-технической ды культурань ёнкстнэсэ вейсэнь важодеманть. Документэнть алов кедьчелькест путызь Мордовиянь лидерэсь Владимир Волков ды Белоруссиянь премьер-министрань полавтыцясь Владимир Семашко.
Владимир Волков тешкстызе, Беларусь Республиканть ды минек региононть вейсэндить ялгаксчинь умонь сюлмотне. 2014 иестэ Белоруссиясо Мордовиянь делегациянть улемстэ Владимир Волков вастовкшнось президентэнть Александр Лукашенко марто ды ваннынзе Минскоень зярыя покш предприятиятнень.
«Течи Мордовиянть ды Беларусенть ютксо внешнеторговой оборотось саи колмоце пельксэнть СНГ-нь мастортнэнь марто республикань микшнемань-экономикань вейсэнь важодемань покшолманть эйстэ. Беларусь Республиканть марто кирдить сюлмот минек региононь 30 ламо предприятият», – тешкстызе Мордовиянь лидерэсь.
Беларусев республикастонть пачтяви кабель, резинотехнической теевкст, электротехнической ды полупроводникень продукция, алюминий, цемент, кондитерской изделият. Беларусесь пачти Мордовияв оборудования ды механической устройстват, пластмассат ды сынст эйстэ теевкст. Эряви тешкстамс, республикань аграрной секторсонть пеледест ламо трактортнэ – теезь Белоруссиясо. Теде башка, 2011 иестэнть саезь Саранск ошонь округонь муниципальной маршрутнэсэ ардтнить Минской автомобилень заводонь автобустнэ, те пассажирэнь усксемань пек вадря транспорт. 2017 иень ушодовомсто республикав састь Минской заводонь 50 автобуст, конат кармить нолдазь тевс Футболонь коряс масторлангонь чемпионатонть ютавтома шкасто.
«Кеман, вейсэнь важодемадо тешкстазь соглашениясь максы од эскелькс кавтоёндонь важодемань сюлмотнень кемекстамонтень. Минь карматано седеяк лезэвстэ важодеме экономикань ламот отраслятнесэ, ютксост промышленностесь, велень хозяйствась, карматано арсеме-нолдамо тевс вейсэнь проектт», – тешкстызе Владимир Волков.
Мордовия Республикань Прявтонть пресс-службась