Февралень 22-це чистэ Мордовиянь Прявтось Владимир Волков ульнесь кенярксчинь промкссонть, конась алтазель Отечествань ванстыцянь чинтень, ёвтась пурнавозетненень поздоровт весераськень кенярксчинть кувалма, явшинзе покш казнетнень ды ваннызе неень шкань оружиянь ды военной экипировкань выставканть.
Кенярксчинь промкссонть улемстэ, Владимир Волков тешкстызе, залонтень пурнавсть сеть, кить алтызь эсест эрямост масторонь ванстомантень, кить свал кемевикст присягантень ды Отечествантень, педе пев топавтсь эсест долгост Тиринь масторонть икеле.
«Ламот ютызь Ине Отечественной войнань стака иетнень, афганонь войнанть, Кавказсо боевой тевдеематнень ды зярыя лия локальной войнатнень ды а ладямотнень. Подвиг, конась малавикс войнансентень, топавтсть Чернобылень АЭС-сэ авариянь витицятне. Эрьва чистэ боевой постсо минек идицятне ды толонь мадстицятне, правань ванстомань органонь важодицятне. Течи те залсонть Ине Отечественной войнань ветерантнэ. Кие бу течи аволь терявтне одс сермадомс историянть, ине Изнямодонть валдо ледстнематне эрить минек эрьва семиясо. Мельвановикс ветерантт, минь ёвтатано тенк сюкпря весе эрицятнень пельде тынк подвигенк кисэ, эрямс, кастомс эйкакшт ды нуцькат, кирдемс каштанчи эсенек масторонть коряс возможностенть кисэ. Отечествань ванстыця чи марто тынк!
Сюкпрянь башка вал марто мон пшкадян воинтнэнень-профессионалтнэнень, кадрань офицертнэнень. Тынк туртов истят чарькодематне, кода Тиринь масторонтень служамось, долгонтень кемечись, офицерэнь честесь аштить эрямонь смустекс, сынь свал шкас тешкстызь тынк уцясканк.
Течи минь ёвтатано поздоровт сетненень, кить аштить боевой постсо. Мордовиянь кавто тёжадо ламо солдатт-срочникть ды контрактникть честь марто кандыть службаст Россиянь армиясо. Минек республикасто кото сядодо ламо курсантт, суворовецт ды кадетт тонавтнить масторонь военной завдениятнесэ. Минек масторось свал кирдсь каштанчи а пелиця воинтнэнь коряс. Воинской койтне, покштятнень-бабатнень ине тевест коряс каштанчись лездыть молемс икелев ды изнямс. Мордовиясь кирди мельсэнзэ эсензэ геройтнень», – мерсь республикань Прявтось.
Россиянь Геройтнень чинтень, конась тешкстави декабрянь 8-це чистэ, вадря казнекс кармась Саранскойсэ Россиянь келес васенце проспектэнть панжомась, конанень максозь Россиянь Армиянь лемесь. «Ней минек ули эштё вейке вадря арсеманок: «Юбилейный» микрорайононть ваксс теемс «Патриот» тематикань парк, косо кармить улеме военной техникань образецт, тир, мереви ютавтомс историянь реконструкцият. Те пек эрявикс проект од ломантнень военно-патриотической лувсо кастомантень. Ды минек улить кортамонок-ладямонок Россиянь Оборонань министерстванть марто», – тешкстызе Владимир Волков.
Региононь руководителесь тешкстызе, властень органтнэнь, военной комиссариатонть ды общественностенть марто вейсэнь важодеманть вельде Мордовиясто призывниктнень невтевксэсь 83,5% седе ламо. Уш зярыя иень перть сон масторонь келес сехте покштнестэ вейкесь.
Мордовиясь теи эсензэ путовксонзо масторонь обороноспособностенть кемекстамонтень. Кенярксичнь промксонтень сакшность Ковылкинасо воинской частень представительтне – масторлангонть келес сехте икеле молицятнень эйстэ вейкенть.
«Радиолокационной станциясь топавты минек масторонть воздушно-космической виев ванстоманть. Тень пингстэ РЛС-нь оборудованиянь покш пельксэсь теезь республикань предприятиятнесэ. Те корты минек заводтнэсэ вадря техникань улемадонть ды тосо важодиця покш квалификациянь специалисттнэде. Минь седе товгак карматано тееме весе эрявиксэнть службань кандоманть туртов вадря условиятнень теемга ды военнослужащейтнень ды сынст семияст социально-бытовой кевкстематнень витемга. Ладязь важодемань вадря сюлмот воинской частнень марто, конат аштить республиканть келес. Ладязь ялгаксчинь ды важодемань кеме сюлмот воинской ламот подразделениятнень марто, косо служить Мордовиянь призывниктне. Тешкстаса, минек цёратнень служамонь таркатнестэ сыть шнамонь валт», – тешкстызе Владимир Волков.
Кенярксчинь промксонь прявт пельксэкс кармась государственной покш казнетнень явшемась. Истя, Россиянь Федерациянь Президентэнть Указонзо коряс физической культуранть ды спортонть виевгавтоманть, ламо иень перть вадря важодеманть кисэ «Заслуженный работник физической культуры Российской Федерации» почётонь лемесь максозь Цыганов Вячеслав Петровичнень – Рузаевкасто трудонь ветеранонтень.
Россиянь Федерациянь Президентэнть кармавтоманзо коряс транспортонь инфраструктурань прявт проекттнэнь топавтомантень покш путовксонть кисэ Россиянь Федерациянь Президентэнть благодарность максозь Филимонов Сергей Николаевичнень – «Антостар» киртязь ответственность марто обществань электрогазосварщикентень.
Мордовия Республикань Прявтонть Указонзо коряс Мордовия Республиканть икеле покш заслуганть ды государственной виев тевдееманть кисэ Славань II степенень орденсэ казезь Крутов Николай Сергеевич, сон 20 иеде ламо ульнесь Мордовия Республикань Прявтонть администрациянь прявтсо.
Кенряксчинь промксонть прядовомга Мордовиянь Прявтось ваннызе неень шкань оружиянь ды военной экипировкань выставканть, конань анокстызе ДОСААФ-нь региононь отделениясь.
Мордовия Республикань Прявтонть пресс-службась