Пецясто, июнень 23-це чистэ, Мордовиянь Прявтонь тевтнень нурька шкас топавтыцясь Владимир Волков ульнесь 2017 иестэ школань прядыцятненень «Тонавтнемасо башка изнявкстнэнь кисэ» медалень каземань церемониясонть, конась ютавтовсь Республикань культурань дворецсэнть.
«Течи мон пшкадян тенк эрямонь сехте редявикс ды торжественной шкатнестэ вейкестэнть! Те залонтень пурнавсть минек ёроков ды весемес чарькодиця эйкакшонок, Мордовиянь сехте превей школасо тонавтницятне, - мерсь региононь руководителесь. - Тынь — се поколениянь представительтне, конат чачсть пингетнень вейсэндямосо, од тёжа иень эйкакшт. Самай тынк лангс путовить масторонь ды республикань виевгавтомань коряс башка кемематне. Тынь — Тиринь масторонь сырнень сюпавчизэ, минек прявт виенек, кадрань прявт потенциал!»
Те чистэнть шнамонь валт ёвтавсть тетятнень-аватнень лемс.
«Тынк тетянк-аванк кассть пек вадрят тейтерть ды церат. Истят, конатнень лангс кемить аволь ансяк сынсь, истя жо республикась, весе масторось. Пачтинк тенст, инескеть, сехте лембе ды вадря арсема марто неть сёрматнень! Арсян тенк, мельвановикс тетят-ават, эйкакшонк свал кенярдовтовольть тынк, сынст эрямосо эрьва эскельксэсь улезэ редявиксэкс ды лезэвекс», - мерсь Владимир Волков.
Шнамонь башка валт ёвтазельть тонавтыцятнень лемс, конат тейсть пек ламо школань прядыцятне кармаст превей ды ламонь содыця, прянь парсте ветиця ды видечинь кис аштиця, Тиринь ёнксонь вечкиця ломанекс.
Тонавтнемань ютазь иестэнть школасо тонавтницятне невтсть редявикс результатт олимпиадатнесэ, раськеютконь ды весероссиянь од ломанень ламот форумтнесэ. Мордовиясь сови масторсонть икельцетнень юткс ёроков эйкакштненень лезксэнь явоманть коряс. Омбоце ие Ёроков эйкакштнень туртов лицеесь саи омбоце тарка «500 лучших школ России» рейтингсэнть, тосо тонавтницятне кенярдовтыть од изнявкссост.
Ютазь иестэ Весероссиянь олимпиадасо тонавтницятне сайсть казнень 47 таркат. Те республикань олимпиадань движениянь историясонть од рекорд! Школасо тонавтницятнень ютксо весероссиянь олимпиадань региононь ды меельце этапонь 129 изницят ды призёрт.
«Весе неть изнявкстнэ — тынк домка содамочинь невтевкст, покш изнявкстнэс тынк васенце ды пек эрявикс эскельксэнк. Кикс тынь карматадо, васняяк ашти эсенк эйстэ, - тешкстызе Мордовиянь Прявтонь тевтнень нурька шкас топавтыцясь. - Икеле сехте стака школась — эрямонь школась. Арсян, малав эрьвась эйстэнк кочкизе сы шкань профессиянть, тонавтнемань тарканть. Нама, тынк кочкамось — тынк праванк. Ансяк тешкстаса, од ломантнень туртов прявтокс ашти молемс се киванть, конась тенст вечкеви, аволь се, конанть ланга молить весе. Изнявкстнэнь саемга, эряви важодемс вечкевикс тевсэ».
В.Д.Волков истя жо тешкстызе, покштне сеедьстэ сёвныть неень шкань од ломантнень. Сынь, келя, овсе колавсть, мездеяк а арсить, кода кортыть «прясост арась инязор». Аволь истямо музыкась, оршамотне, прянь аволь видестэ ветямось. «Мон истя овсе а арсян. Минек касыть пек вадрят, превейть ды ёроковт од ломанть. Тынь пек видестэ невтядо, од ломантнень марто минек весемесь пек вадря! Весе минь: Республикань Прявтось, тонавтыцятне, ды, нама, тынк тетянк-аванк кирдтяно алкуксонь каштанчи тынк ды тынк изнявксонк, неень шкань технологиятнень куроксто чарькодемань ды весемесэ кенереманть коряс», - мерсь сон.
«Прявтось, мезес мон тынк кармавтан — илядо стяко ёмавтне шканть! Тонавтнеде, яводо мель одонтень, келейгавтодо ванновтонк. Кинень, бути аволь тыненк, молемс ве эскелькссэ шканть марто, невтемс эсь прянть наукасо ды шкинемасо. Свал улест од бажамонк, путодо икеленк, васенце вановтонть коряс, а топавтовиця задачат. Саеде покш изнявкст! Прявтось — зярдояк илядо пота удалов! Тынк лавтовонк удало — тетянк-аванк, тонавтыцянк, эрямос ветицянк. Тынк Тиринь ёнксонк — Россиясь ды Мордовиясь! Кемеде эсь вийтнес! А минь кемтяно тынк лангс!», - мерсь Владимир Волков.
Школань прядыцятненень поздоровт ёвтасть МР-нь Госсобраниянь Председателесь В.В.Чибиркин, МР-нь Правительствань Председателесь В.Ф.Сушков, Саранск ошонь округонь прявтось П.Н.Тултаев.
Школасо тонавтницятненень казсть медальть ды част, чачома чинь тешкстыцятненень истя жо максовсть ледстнемань казнеть МР-нь Прявтонь тевтнень нурька шкас топавтыцянть В.Д.Волковонь пельде.