Мордовиянь Прявтось Владимир Волков сентябрянь 20-це чистэ Кремлясо ульнесь Россиянь Президентэнть региононь кочказь прявттнэнь мрато вастовомасонть.
Вастовоманть панжомсто Владимир Путин тешкстызе, сентябрянь 10 чинь кочкамонь итогтнень коряс ашти паро мельсэ, изнясть сонзэ евтавт кандидаттнэ. Седе ламот одс кочкавт прявттнэнь кисэ эсь вайгелест максызь 60 ламо процентт кочкицятне. Ледстясынек, Владимир Волковонь кис эсь вайгелест максызь 89,19 процентт кочкамотнес сыцятнень эйстэ. Кода тешкстызе Президентэсь, те покш кемема ды теке шкасто — кочкамонь участкатнес сыцятнень покш учомаст. «Ламось уш теезь, седе ламо жо эште теема. Улить паро енов полавтомат здравоохраниениянь, жилищно-коммунальной хозяйствань, образованиянь сфератнесэ», – мерсь Владимир Путин.
Истя жо государствань прявтось тешкстызе, кочказь губернатортнэнь ютксо улить кода покш опыт марто представительть, истя од ломантькак, конатнень лангс путовить покш кемемат. Истя жо Президентэсь тешкстызе, субъекттнэнь кочказь прявттнэнь командатнень пурнамонть теема седе панжадокс, од ломантне неевельть, профессиональной касомась васняяк сюлмавозь сынст маштоматнень, содамочитнень ды ломантнень лезэс паро важодеманть марто.
Владимир Путин пурнавозтнень марто кортась сы шкань тевтнеде ды евтась мель, субъекттнэнь кочказь прявттнэ тевс нолдасызь весе содамочист, опытэст ды кармить седе тов вадрясто топавтомо икелест путозь тевтнень регионтнэнь виевгавтомга.
Мордовия Республикань Прявтонть пресс-службась