Спортивной якамонь Мордовиянь школась эри ды карми эрямо. Истя мерсь Мордовиянь руководителесь Владимир Волков августонь 15-це чистэ шожда атлетикань коряс раськеютконь пелькстамотнесэ изницятнень ды призёртнэнь марто вастовомасонть.
Республикань лидерэсь ёвтась поздоровт олимпийской резервань спортивной школань воспитанниктненень масторлангонь аренасонть вадря стартнэнь кувалма. Лондонсо шожда атлетикань коряс раськеютконь XVI чемпионатсонть 18 иесэ спортсменэсь Сергей Широбоков сайсь сиянь медаль, теде икеле изнясь юниортнэнь ютксо шожда атлетикань коряс Европань чемпионатсонть, конась ютавтовсь Италиянь Гроссето ошсонть. Клавдия Афанасьева изнясь Польшасо од ломантнень ютксо ютксо шожда атлетикань коряс Европань чемпионатсонть, Салават Илькаев – Кениясо од цёратнень ютксо масторлангонь первенствань сиянь призёр.
Спортсментнэнь поздоровонь ёвтамсто Владимир Волков тешкстызе: якамонь коряс мордовиянь школась цидярдсь ды полады виевгадомо. «Зярдо лиссть стакачить, минь эзинек нолда кеденек ды поладынек лездамо школантень. Ней минь нейтяно: истя жо ламот бажить понгомс спортивной якамонтень, минь ванстынек од ломантнень мелест спортонь те видэнтень. Од спортсментнэ, конат вадрясто невтизь пряст весероссиянь ды масторлангонь пелькстамотнесэ, – тенень сехте вадря невтевкс. Школась ули, сон эри ды карми эрямо, минь жо поладтано лездамо тензэ», – тешкстызе Мордовиянь лидерэсь.
Физической культурасо ды спортсо изнявкстнэнь ды спортонь покш результаттнэнь кисэ Сергей Широбоковнень максозь «Заслуженный работник физической культуры Республики Мордовия» почётонь лемесь. Владимир Волков истя жо макссь спортсменэнтень квартирань получамонь сертификат. Клавдия Афанасьева ды Салават Илькаев кармасть Мордовия Республикань Прявтонь премиянь лауреатокс.
Республикань руководителесь арсесь спортсментнэнень изнявкст ды пачтясь, маласо шкастонть олимпийской резервань спортонь школань ворспитанниктнень карми улеме возможностест иень перть ютамс тренировкат вадря условиясо: иенть прядовомсто панжови шожда атлетикань манежесь. «Эряви поладомс важодемс теке жо лувсонть, масторлангонь аренасонть авторитетэнть одс изнямга ды велявтомс Мордовиянь спортонь якамонь школантень эсензэ гайтев лемензэ», – тешкстызе Владимир Волков.
Мордовия Республикань Прявтонть пресс-службась