Середасто, мартонь 22-це чистэ, Республикань Кудосонть Владимир Волков ютавтсь покш промкс республикань муниципальной районтнэнь прявттнэнь ды властень органтнэнь представительтнень марто, кортамось мольсь экономикань ды социальной сферань виевгавтомань прявт кевкстематнень коряс. Кортавсть 2016 иень итогтне ды ванкшновсть прявт тевтне неень шкантень. Республикань Прявтось башка мель явсь сеть стака кевкстематненень, конатнень эряви витемс маласо шкастонь ды саемс башка ванновт алов.
Экономикань ды социальной сферань прявт отраслятнесэ вадря динамикась ванстови 2017 иенть ушодовомстояк.
«Тедедень кавто ковтнень перть важодемань невтевкстнэ парт, - тешкстызе Владимир Волков. - Седе пек те редяви промышленностенть коряс: бути 2016 иестэ республикасонть промышленной производствань индексэсь ульнесь 100,5 процент, те иень январьстэ-февральстэ - 117 процентт».
Покш изнявкст 2016 иестэнть саезь велень хозяйствасонть. Седеяк покш тевть аграрийтнень икелев путсь Республикань Прявтось тедеде - пурнамс 1 млн. 330 тёжат тоннадо ламо сюро, 1 млн. 100 тёжат тоннат ламбамо якстерькай, ламолгавтомс видемань паксятнень 713 тёжат гектарс. Башка тешкстазель ракшатнень ламолгавтомась - аволь ансяк общественной стадатнесэ, башка хозяйстватнесэяк, истя жо а нолдамс видемань паксятнень киртямонть ды берянь качествань видьметнень тевс нолдамонть.
Муниципальной образованиятнень прявттнэнень кармавтозь теемс «инвестициянь паспортт», косо тешкставить районсонть улиця инвестициянь тевс апак нолда площадкатне. «Бути а улить теезь эрявикс документтнэ, республикась ёмавтсынзе инвесторттнэнь, тень кодаяк а эряви нолдамс!», - мерсь райононь прявттнэнень Владимир Волков.
Бути кортамс строительствадонть -тевс нолдазь весе программатне, конатнень коряс республикасонть строявсть ды витневсть эрямо таркатне, китне, школатне ды эйдень кужотне, улить поладозь 2017 иестэнтькак. Башка мель явови эрямо таркань строямонтень. «Миненек а эряви вишкалгавтомс эрямо таркань строямонь покшолматнень - те пек эрявикс республикань эрицятненень. Бути регионсонть карми строявомо рамавиця эрямо тарка - седе аламо ломанть кармить туеме лия ёнксов», - тешкстызе Владимир Волков.
Эряви тешкстамс, Мордовиясо эрямо таркань строямонь кастомась, ков совавтозь льготань 5% ипотекась, конась важоди 2017 иенть прядовомс, лездась ламолгавтомс республикань эрицятнень. Невтемга, 2017 иень кавто ковтнень миграциянь касомась кармась 4,5 тёжат ломанть.
Владимир Волков кармавтсь вадрялгавтомс стявтовиця объекттнэнь качестванть ды топавтомс максомань шканть. Те башка токши ташто кудосто одс эрицятнень ютавтомань программанть, истя жо эрямонь кудотнень педе пев витнеманть. Тедеде республикасонть ламо квартирань 206 кудотнень капитальной витнемантень явовить 518 млн. целковойть.
Республикань Прявтось истя жо тешкстызе, од микрорайонтнэсэ социальной ды бытовой инфраструктуранть эряви теемс эрямонь кудотнень стявтоманть марто. «Кудотнень маласо тарканть вадрялгавтомась, китне, лавкатне, эйдень кужотне, общественной транспортось - весе неть кевкстематнень эряви витемс шкастост», - тешкстызе региононь Прявтось.
ЖКХ-нь сферасонть Владимир Волков кармавтсь муниципальной районтнэнь прявттнэнень кирдемс эсест ванновт ало весе пшти кевкстематнень, седе пек важодемань заказонь теицятнень (ГУКтнень, управляющей компаниятнень) подрядчиктнень марто вейсэнь важодеманть. Сеедьстэ, кода тешкстызе Республикань Прявтось, подрядтнэ максовить управляющей компаниятнень содавиксэст-малавиксэст туртов, тень эйстэ - важодемань берянь качествась, конань кисэ кияк а кирди ответственность. Мордовиянь Прявтось кармавтсь витемс тевтнень те сферасонть ды кастомс эрицятненень явовиця услугатнень качестваст.
Федеральной бюджетстэ явовиця лезксэнть вельде республикасонть социальной ды экономикань программатнень топавтомадонть кортамсто Владимир Волков тешкстызе Президентэнть маень Указтнэнь шкастонзо кемекстамонть ды сынст лезэвчист: «Сынь лездасть куроксто витемс регионтнэсэ, истя жо Мордовиясонть, минек эрицятнень сехте талновтыця кевкстематнень».
Мордовия Республикань Прявтонть пресс-службась