Мордовиянь Прявтось Владимир Волков апрелень 9-це чистэ вастовкшнось Равчирень федеральной округсо Россиянь аволь зависимой профсоюзонь Федерациянь представителенть Владислав Трубников марто. Вастовомасонть толковавсть властенть ды профсоюзтнэнь вейсэнь важодемаст регионсонть социальной сэтьмечинть ванстомга.
Истя жо кортамо мольсь Тундонь ды Трудонь Кенярксчинтень алтазь республикань мероприятиятнень ютавтомадост. Мордовиянь Прявтонть Указонзо коряс, апрелень 27-це чистэ Саранскойсэ ютавтови республикань торжественной промкс, конась алтазь трудонь коллективтнень пелькстамосонть изницятнень, «Лучший по профессии» пелькстамонь лауреаттнэнь, «Коллективный договор – основа защиты трудовых прав работников» республикань пелькстамосонть ды «Российская организация высокой социальной эффективности» Весероссиянь пелькстамонь региононь этапонь изницятнень, истя жо важодемань династиятнень чествовамонтень.
Маень 1-це чистэ республикань келес ютавтовить митингт, концерт, патриотической акцият, культурно-массовой мероприятият.
Мордовия Республикань Прявтонть пресс-службась