Ютавтовсь Мордовиянь Прявтонть Артём Здуновонь «Быть» фильмань режиссёронть Александр Ковтунец марто вастовомась

Ютавтовсь Мордовиянь Прявтонть Артём Здуновонь «Быть» фильмань режиссёронть Александр Ковтунец марто вастовомась

Мордовиясь вейсэндявсь  «Всероссийские детские кинопремьеры» проектэнтень, конань ушодызе РФ-нь Просвещениянь министерствась. Проектэнть лувсо сундерьковонь 27-це чистэнть саезь весе масторонь келес образованиянь учреждениятнесэ ушодови «Быть» художественной фильмань невтемась. Сундерьковонь 16-це чистэ Саранскоень «Высота» од школасонть картинанть ваномасо ульнесь сонзэ теицязо - режиссерось Александр Ковтунец. «Быть» художественной фильмась евтни неень шкань од ломанденть, эсь прянзо вечкицядонть, конась а максы питне тетянтень-авантень, арась мелезэ пурнамс семия, чачтомс эйдеть. Зярыя цидярдоматнень пачк ютазь, сон одс ванносынзе эрямонь питнейчитнень – ней прявт героесь анок максомс эрямонзо малавиксэнть кисэ, ули возможностесэ  пурнамс семия ды кармамс тетякс.

Фильмась эйкакштненень туи мельс комедиянь шожда жанрасонть. Картинась лезды кемекстамс свалшкань духовно-нравственной питнейчитнень ды раськетнень ванстомань тевтнень, конатнень путынзе Россиянь Президентэсь.

Сундерьковонь 16-це чистэ Республикань Кудосонть режиссёронть Александр Ковтунец марто вастовсь Мордовиянь Прявтось Артём Здунов. Сынь кортасть фильманть теемадонзо ды картинасонть кепедезь кевкстематнеде.

Мордовиянь Прявтось тешкстызе: «Мельспаро, Россиясо тееви кино, конань кармить ваномо зярыя кементь иетнень ютазь. Семиянь темась ней прявт. Минь республикасонть явтано те кевкстемантень покш мель, секскак минек улить стакачить чачтоматнень марто. Ды ушодомс, арсян, эряви, вейсэнь питнейчитнень ды семиянь теемань юртнэнь эйстэ, сень эйстэ, мезде арсить од ломантне, зярдо теить семия».

«Монь туртов пек питней: те историянть проектэнть лувсо нейсызь масторонь весе школатнень эйкакштне. Икелепелень ловоматнень коряс, фильманть вансызь малав 5 миллионт эйкакшт. Арсян, седе пек те эряви вишка оштнень туртов, – мерсь режиссёрось. – Кенярдан, Мордовиясо те мероприятиясь кирдеви республикань руководителенть уровнясо».

Мордовия Республикань Прявтонь пресс-службась