«Ошонь вадря средань тееманть эйстэ ашти минек масторонь ломантнень паро эрямост. Мордовия Республикась эрязасто вадрялгавты-мазылгавты общественной ды кудотнень перька таркатнень. 2024 иестэ арсеви топавтомс 17 таркат «Формирование комфортной городской среды» федеральной проектэнть коряс. Эряви седе тов теемс эрицятненень оймсемань туртов вадря ды сэтьме таркат. Территориятнень вадрялгавтомась-мазылгавтамось лезды оштнень ды лия эрямонь пункттнэнь виевгавтомантень», – пачтясь Россиянь Минстроень прявтось Ирек Файзуллин.
Росстатонь невтевкстнэнь коряс, 2024 иень васенце ковонть перть Мордовиясо максозь 39,7 тежат кавонзазь метрат эрямонь таркат: 10,1 тежат кавонзазь метрат МКД-тнесэ ды 29,6 тежат кавонзазь метрат – те башка эрямонь таркатнень строямось.
Тешкстазель, тедеде регионсонть «Стимул» программань топавтоманть лувсо арсеви строямс автомобилень ниле кить, канализациянь система ды ведень пачтямонь объект. «Чистая вода» федеральной проектэнть лувсо строяви ведень пачтямонь система Краснослободскойсэ. Мордовиясь истя жо эрязасто топавты каладозь кудотнестэ одс эрицятнень ютавтомань программанть – 2019 иестэнть саезь 86,96 тежат кавонзазь метрат эрямонь таркатнестэ одс ютавтозь 5 тежадо седе ламо ломанть.
Артём Здунов тешкстызе, Президентэнь нацпроекттнэнь ды Россиянь Минстроень программатнень вельде республикасонть удалы топавтомс ламо прявт проектт, конатне теить вадря условият ломантнень эрямост туртов.
«Мелят минь шкадо икеле прядынек каладозь кудотнестэ одс эрицятнень ютавтомань программанть, касстынек республикасонть строямонь покшолматнень, киртинек апак прядо строямонь объекттнэнь ламочист. Покш мель явови ошонь строямонь аравтлувтненень – тевс нолдавить од территориятне, конатнень эряви виевгавтомс весемеендо – теемс кемевикс инфраструктура ды социокультурной объектт», – мерсь Мордовиянь Прявтось.
Мордовия Республикань Прявтонь пресс-службась