Региононь ды эсензэ Артём Здуновонь важодемантень Анна Цивилева макссь покш питне. «Зярдо лиссь Россиянь Президентэнть государственной фондонть теемадо указозо, Артём Алексеевич ульнесь васенце губернатортнэнь ютксо, конатне састь миненек, – евтнесь сон. – Минь сонзэ марто сеске кортынек, мезе лангсо эряви важодемс фондонтень, муинек чарькодема те кевкстемасонть. Ды течи тынк региононь фондонтень монь самось тень тешкстызе. Тынь пек видестэ кочкинк зданиянть, важоди вейке вальмань служба, кочказь социальной координатортнэнь штаб. Монень мельспаро, СВО-нь ветерантнэ - тынк сотрудникенк, социальной координаторонк. Сынь монень евтнесть, региононь властнень пельде лезксэсь явови сеске, целанек. Ды те лезксэнть сынь марить. Секскак евтан сюкпря весе командантень, истя жо республикань руководствантень, покш мелень явоманть ды ответственностенть кисэ. Монень мельспаро, а стувтыть сеть семиятнень, конатне емавтызь цератнень – сыненсткак явови пек покш мель».
Анна Цивилева башка тешкстызе республикасонть нолдазь велявтыця боецтнэнь диспансеризациянь программанть. «Те пек вадря опыт. Ламот цератне, конат ютыть военной тевдеематнень пачк, велявтыть кекшевезь томбавома марто, конат шкань ютазь путыть тешкс шумбрачинть лангс. Ды течи ветерантнэ теде кортасть. Диспансеризациядонть мейле кеместави: ков кучомс ломаненть – лецямо эли реабилитацияс, паряк, сонензэ эряви лия специалисттнэнь лезкс. Те эряви. Миненек эрявить шумбра ломанть. Минь бажатано, штобу сынь эрявольть куватьс. Ды ней минь ветятано кортамот РФ-нь шумбрачинь ванстомань министранть марто сень коряс, штобу Мордовиянь опытэнть ламолгавтомс весе масторонть келес», – мерсь сон.
Артём Здунов мерсь, диспансеризациясь лезды а нолдамс ламот зыянтнэнь. «Секскак сеедьстэ сэредькстнэ, конатнень лангс сонсь ломанесь эзь яво мель, ютыть хроническойс. Седеяк пек эряви диспансеризациясь, бути ульнесть томбавомат, бути улить стакачить ампутациянть марто, протезт эряви путомс. Эдь ломанентень эряви важодемс, эрямс. Секскак мон арсян, те пек паро тев. Минь карматано ютавтомо диспансеризациянть, те важодемась пек эряви минек туртов», – тешкстызе республикань руководителесь.
СВО-нь ветерантнэнень пшкадемстэ, Анна Цивилева мерсь: «Сюкпря тенк смелчинть кисэ, героизманть кисэ. Минь карматано тееме весементь, штобу невтемс минек мелень явоманть. Минь нейтяно, кода неть тевтне вейсэндить обществанть, теить сонзэ седе вадрякс, вельмевтить семиянь питнейчитнень. Ней весе вейсэндявить ды чарькодить, мезесь алкукс питней те эрямосонть: семиясь, вечкемась, лездамось, мелень явомась. Те весемень юр. Арсян тыненк ды тынк семиятненень часия ды паро эрямо».
Мордовия Республикань Прявтонь пресс-службась