Зданиять петеманкса средстват нолдафтольхть меля, работатнень марстонь питнесна арась 80 миллион цалковай. Строительхне полафтозь вельхксть, водоснабжениянь сетьтнень, канализациять, отоплениять, элекстроснабжениять, вентиляциять, одкстоптозь потмоширдень отделкать, ладясть тяниень пингонь противопожарнай и охраннай система. Тяни поликлиникась отвечай сембе вешфксненди.
Кода азозе республикань Оцюняти главнай врачсь Валерий Киршев, ремонтсь мольфтевсь цють кизода ламос, но тяни зданиясь получась од эряф. «Сюкпрятейть, Артём Алексеевич, пчксемань учрежденияньконь ширенц кирдеманкса», - мярьгсь сон.
Мордовиянь Оцюнясь корхнесь медицинскяй работникнень и пациенттнень мархта, конат састь приемс, ванозень пчксемань кабинеттнень. Од обору дованиясь, кона тяса ладяф, максси етафнемс качественнай диагностика и аф прважсемс сярядихнень Саранскяи.
«Тя главнайсь — што оснащениясь инь оцю уровеньца, - мярьгсь Артём Здунов. - Кемонь кизода инголе тяфтама ашель. Нацпроектть вельде, кона етафневи эряфс Президентть Владимир Владимирович Путинонь поручениянц коряс, районнай больницятнень эса эвондакшнихть оборудованият, конат лезнихть ломаттненди аф тушендомс пчксема шири, а тиендемс тянь тязк. Одкстоптф поликлиникась кармай служама ломаттненди лама киза».
«Тядде «Здравоохранение» нацпроектонь «Борьба с сердечно-сосудистыми заболеваниями» проектть коряс Краснослободскяень больницяса ладяф од компьютернай томограф, тяни эздост тяса кафта, - азозе МР-нь здравоохранениянь министрсь Олег Маркин. - Тяса основной задачась — мумс сердечно-сосудистай потологиять, цебярьгофтомс ломанть прянь маряманц».
Корхтамок первичнай звенать одкстопнеманц колга, азсаськ, што программась арьсеф 2025 кизоть самс. Тядде Мордовияса шумордаф колма поликлиникатнень капремонтсна: Кочкуровскяй и Краснослободскяй райоттнень эса и Саранскяйса. 2023 кизоня шумордави Рузаевкаса и Комсомольскяйса поликлиникатнень петемасна, аноклави ПСД нинге 10 поликлиникатнень петеманкса Саранскяйса и республикань райоттнень эса.
Мордовия Республикань Оцюнять пресс-службац