Медьковонь 4-це чистэ Мордовиянь Правительствань Председателесь Владимир Сушков ваннызе, кода Рузаевкань енкссо топавтовить нацпроекттнэ. "Демография" нацпроектэнть лувсо стявтови 108 таркас эйдень кужо. Объектэнть питнезэ - малав 100 млн. целковойть, 70 ламо млн. явозь федеральной бюджетстэ. Эйдень кужонть арсеви панжомс 2020 иенть прядовомсто.
Истя жо Владимир Сушков ваннызе «Безопасные и качественные автомобильные дороги» нацпроектэнть лувсо стявтовиця кинть, сон моли Рузаевканть перька. Кись канды покш смусть ошонь виевгавтоманть туртов. Кинь строямонь васенце этапонть питнезэ 1,5 млрд. целковойть. Проектэнть лувсо теевить кавто сэдть ды ведень нолдамонь кото трубат.